Malema kla oor 'agenda' teen Zuma
2010-06-07 04:32
Johannesburg – "Mense" het 'n agenda teen pres. Jacob Zuma en wil seker maak daar is 'n "gaping" tussen hom en die ANC-jeugliga, het Julius Malema Sondag in Polokwane gesê.
"Daar's 'n agenda, daar is mense wat dag en nag werk om seker te maak daar is 'n gaping tussen u en die jeugliga," het Malema by 'n herdenkingsbyeenkoms vir Peter Mokaba in die teenwoordigheid van pres. Zuma gesê.
"Ons het die nuutste berigte gesien; hulle is niks, en u is die president; u moet u nooit laat onderkry deur kleinlikhede nie," het hy gesê, met verwysing na bewerings dat een van pres. Zuma se vroue, Nompumelelo, buite egtelike verhoudings gehad het.
"Hoe meer slegte berigte hulle skryf oor Zuma, hoe meer sal ons agter hom staan. As jy die president wil vernietig, skryf baie mooi goed oor hom.
"Zuma is president vandag, môre, en na 2012," het hy gesê terwyl die gehoor sy bynaam, "Juju, Juju", gedreunsing het en op vuvuzelas geblaas het.
Malema het later ook weer oor nasionalisering gepraat.
"Ons wil hê die ekonomie van Suid-Afrika moet in die hande van die mense van Suid-Afrika wees. Ons wil hê die myne van Sekhukhune moet aan die mense van Sekhukhune behoort... ons wil he die mense van Waterberg moet hulle grond besit.
"Ons wil terugkeer na dit wat die wit regime van ons weggeneem het. Ons wil seker maak die eise van die Vryheidshandves word 'n realiteit."
- SAPA