Malema kap Zuma wéér

2012-11-30 12:47

Kaapstad – Julius Malema het sy ondersteuners toegespreek nadat hy in die hof op aanklag van geldwassery verskyn het.

“Ek staan voor julle. Ek het nie vlinders in my maag nie. Ek sal vir politieke redes tronk toe gaan...” het hy buite die hof aan sy aanhangers in Polokwane, Limpopo, gesê.

“Julle kan so veel aanklagte as wat julle wil teen my indien; dit sal nie die feit dat ons ‘n president het wat nie kan lees, verander nie.”

Dit volg nadat hy Vrydagoggend ook van rampokkery aangekla is.

Malema het ook van die geleentheid gebruik gemaak om sy steun aan adj.pres. Kgalema Motlanthe toe te sê.

“Motlanthe is die oplossing. Hy moet ondersteun word.”

Hy het verwys na die ANC se verkiesingskongres wat volgende maand in Mangaung gehou word.

Volgens berigte het die omstrede politikus die tong-in-kies-weergawe van die struggle-lied “Skiet die boer” gesing.

Sy ondersteuners het hom hard toegejuig toe hy “Soen die boer” gesing het.

Volg Nuus24 op Twitter