'Malema kan skuldig bevind word' – kenner
2012-09-21 19:28
Johannesburg – Julius Malema kan daaraan skuldig bevind word dat hy mynwerkers tot geweld aangehits het, ongeag of hy hulle beïnvloed het, het ‘n kenner gesê.
Carel Snyman, ‘n voormalige dosent in kriminele reg van die Universiteit van Suid-Afrika, het tot die slotsom gekom dat Malema nie ‘n geldige verweer teen die aanklagte van aanhitsing het nie.
Snyman is deur die vakbond Solidariteit gevra om ‘n ekspert-siening oor die kwessie saam te stel.
Die vakbond het later kriminele aanklagte van aanhitsing tot geweld en intimidasie teen Malema gebring, ná opmerkings wat hy aan stakende mynwerkers gemaak het om die myne “onregeerbaar” te maak.
Dirk Hermann, die adjunk algemene-sekretaris van Solidariteit, het Vrydag gesê Snyman het gevind Malema het nie ‘n geldige verdediging nie.
“Dit maak nie saak of die mynwerkers op enige wyse deur Malema se uitlatings beïnvloed is of nie,” het hy in ‘n verklaring gesê.
“Aanhitsing om enige misdaad te pleeg is strafbaar. Die definisie van aanhitsing onderskei nie tussen suksesvolle en onsuksesvolle aanhitsing nie.”
Hermann sê die verslag is aan die Valke gegee om hulle by te staan in hul ondersoek in die aanklagte teen Malema.
– Volg Nuus24 op Twitter
- SAPA
