Malema-hofsaak duur voort
2009-08-31 09:06
Johannesburg – Die omstrede leier van die ANC-jeugliga, Julius Malema, word weer in die gelykheidshof verwag wanneer die haatspraak-klag teen hom voortgaan.
Die Sonke Gender Justice Network het ’n klag van haatspraak, diskriminasie en teistering teen Malema gelê oor sy kommentaar oor ’n vrou wat pres. Jacob Zuma van verkragting aangekla het.
Malema het glo gesê Khwezi (skuilnaam van die klaer) het ’n “lekker tyd” gehad. “As ’n vrou dit (seks) nie geniet nie, loop sy vroeg in die oggend. Diegene wat dit geniet het, wag totdat die son opkom en vra vir ontbyt en taxigeld.
“Die oggend het dáái vrou ontbyt en taxigeld gevra,” het hy glo gesê. “Jy kan nie taxigeld vra van iemand wat jou verkrag het nie.”
Die Sonke Gender Justice Network eis ’n verskoning en R50 000 skadevergoeding wat aan ’n skuiling vir mishandelde vroue betaal sal word.
Tydens die vorige verhoor in die gelykheidshof, het Malema erken dat hy die opmerking gemaak het, maar het gesê dat dit in die konteks van die uitspraak was wat Zuma vrygespreek het.
Luidens ’n verklaring van Lisa Vetten , ’n senior navorser by die Tshwaranang Legal Advocacy Centre, is daar geen verwysing in die uitspraak dat die vrou vir ontbyt of taxigeld gevra het nie.
Tumi Mokwena, Malema se prokureur, het tydens die laaste verhoor gesê dat hulle dalk gaan aansoek doen om dié saak van die rol te laat skraap.
– Sapa