Malema het 'voorkeurbehandeling' gekry
2012-09-20 19:24
Johannesburg – Julius Malema het voorkeurbehandeling van die Onafhanklike Verkiesingskommissie (OVK) tydens ‘n tussenverkiesing in Limpopo gekry, het die DA Donderdag gesê.
‘n Tussenverkiesing is Woensdag in Seshego, deel van die stemdistrik in Polokwane, gehou.
“Mnr. Malema is eerstens toegelaat om die kiesstasie in sy konvooi te nader en is toegelaat om na die OVK se afgesperde gebied te ry wat om die kiesstasie was,” het Mmusi Maimane, ‘n woordvoerder, gesê.
Kiesers word gewoonlik slegs toegelaat om hierdie gebied te voet te betree om in die tou te staan sodat hulle hul kruisie kan trek.
Malema is ook toegelaat om die toue te vermy en hy is reguit na die stemlokaal.
In elke ander verkiesing het leiers van die DA en die ANC hul beurt afgewag, het die party gesê.
Die OVK is veronderstel om alle Suid-Afrikaners gelyk en regverdig te behandel.
“Mnr. Malema het gister (Woensdag) sy disrespek vir ander kiesers getoon deur nie in die tou te staan nie,” het Maimane gesê.
Die OVK het alle ander kiesers verbied om die stemlokaal binne te gaan terwyl Malema sy kruisie getrek het.
“Verteenwoordigers van die DA wat binne die stemlokaal was, sê die OVK het ‘n spesifieke opdrag gegee om ander kiesers uit die saal te hou terwyl Malema stem,” het hy gesê.
“Spesiale reëlings is vir een individu getref terwyl ander kiesers buite in die tou moes wag.”
Sulke voorvalle is onaanvaarbaar en die party het aan die OVK geskryf om ‘n verduideliking te gee.
Kate Bapela, woordvoerder van die OVK, was nie onmiddellik vir kommentaar beskikbaar nie.
– Volg Nuus24 op Twitter
- SAPA
