'Malema het sy steun oorskat'
2012-02-06 07:02
Kaapstad. – Wes-Kaapse leiers van die ANC-jeugliga het in die naweek ’n beroep op jeugliga-lede hier gedoen om “kalm te bly”.
Dié verwikkeling volg op die uitspraak, ook in die naweek, van die ANC se nasionale appèlkomitee oor die beleërde jeugliga-leier, Julius Malema, en vyf ander uitvoerende komiteelede van dié liga.
Op een na is al die skuldigbevindings van die nasionale dissiplinêre komitee teen hulle gehandhaaf.
Nyameka Mquzulo, woordvoerder vir die Kaapse metro-streek, het gesê die meeste jeugliga-lede was “teleurgesteld” oor die bevindinge.
“Ons vra almal om die demokratiese proses te respekteer,” het hy gesê.
“Jeugliga-strukture hier gaan voort met besprekings rondom nasionalisering. Kwessies rondom ekonomiese vryheid, veral nasionalisering, is ’n kwessie wat die hele jeugliga dryf.
“Dit is nie net ’n Malema-kwessie nie, en dit gaan nie nou versaak word nie.”
Die jeugliga-leierskap in Mpumalanga het skerper teen die bevindinge van die appèlkomitee uitgevaar.
Sapa berig die leierskap het in ’n verklaring gesê die jeugliga is “aangerand en gevange geneem deur sy eie mense”.
“Nog nooit was dit so moeilik vir ’n rewolusionêre jeugbeweging om sy organisatoriese onafhanklikheid so te moet handhaaf nie.”
Maar volgens AfriForum, wat al met Malema in die hof gaan draai het, bied die bevindinge teen Malema ’n gulde geleentheid aan landsburgers om te werk om gemeenskapsverhoudinge te normaliseer.
Kallie Kriel, uitvoerende hoof het in ’n verklaring gesê Malema het sy steun oorskat.
“Die ANC kon baie van die skade wat Malema aan gemeenskapsverhoudinge aangerig het, voorkom het as hy vroeër teen hom opgetree het, maar hierdie is ’n geval van liewer laat as nooit.”
Ook die DA Jeug het die bevinding verwelkom.
“Ons hoop dit is die einde van sensasionele boelie-politiek wat die aandag op een individu ten koste van werklike jeugkwessies gevestig het,” het Makashule Gana, DA-jeugleier, gesê.
– Volg Nuus24 op Twitter
- Die Burger