Malema 'het nog baie ondersteuners'
2011-08-19 12:34
Johannesburg – Afhangend van hoe Julius Malema die dissiplinêre verhoor teen hom benader kan hy moontlik net 'n raps oor die vingers kry, het Prof. Adam Habib, politieke ontleder, op die eNews-kanaal gesê.
"As hy in woede reageer sal mense net sê dis hoekom ons hom uit sy posisie moet verwyder. Maar hy kan hom ook onderwerp aan die party se dissiplinêre komitee en miskien net 'n raps oor die vingers kry," het Habib gesê.
Die ANC se tugkomitee het Vrydag aangekondig dat die ANC-leierskap klagtes teen Malema gelê het en dat hy voor dié komitee sal verskyn.
"Kameraad Julius Malema is aangekla vir verskeie oortredings van die ANC se gronwet, insluitend dat hy die party in oneer gebring het oor sy uitlatings oor Botswana en dat hy verdeeldheid saai in die range van die ANC," het Derek Hanekom, voorsitter van die tugkomitee, in 'n verklaring gesê.
Malema het vroeër vandeesmaand gesê het hy het planne om ’n “bevelspan” saam te stel om weerstand te organiseer teen die president van Botswana, Ian Khama, se bewind, het Die Burger vroeër berig.
"Malema sal tydens 'n verhoor 'n geleentheid gegee word om homself te verdedig. Hy is geregtig op die verteenwoordiging van 'n ANC-lid wie se lidmaatskap in goeie stand is," het Hanekom gesê.
Mathews Phosa, ANC-tesourier, het Malema tydens 'n soortgelyke verhoor in 2010 verteenwoordig.
Die paneel het hom skuldig bevind op verskeie aanklagte en het gesê indien hy 'n soortgelyke oortreding binne 'n tweejaar-tydperk begaan, hy uit die ANC geskors kan word.
Op die vraag of Malema geskors sal word, het Habib gesê: "Dis nie 'n uitgemaakte saak nie – daar is nog baie mense wat Julius Malema ondersteun en hulle sal hulle stemme dik maak in die volgende paar dae."
Habib het ook gesê indien die ANC-leierskap nou optree, sal dit verdeeldheid bring (in die party) voor volgende jaar se nasionale konferensie.
"Ek dink daar is senior lede in die ANC wat veral ongelukkig is oor sy optrede die laaste paar maande. Maar 'n mens moet ook onthou dat hy baie ondersteuners in die party het."
Op die vraag of Malema gepos gaan word, het Habib gesê: "Dis nie 'n uitgemaakte saak nie – daar is nog baie mense wat Julius Malema ondersteun en hulle sal hulle stemme dik maak oor die volgende paar dae."
Die ANC het gesê die saak is nou in die hande van die tugkomitee, wat die datum, plek en tyd van die verhoor sal bepaal.
– Volg Nuus24 op Twitter
- Nuus24