Malema gewaarsku oor inmenging

2012-09-05 23:19

Johannesburg –  Collins Chabane, minister in die presidensie, het die voormalige leier van ANC-jeugliga, Julius Malema, en ander politici gewaarsku oor hul inmenging in loondispute, berig Eyewitness News.

Hy het gesê politici sal die gevolge van hul "opruiende stellings" moet dra.

Malema en Themba Godi, president van die African People’s Convention, het Lonmin se Marikana-myn besoek en werkers aangemoedig om die bedryf "onregeerbaar" te maak.

Dít volg nadat werkers by die myn begin staak het en 'n loonverhoging geëis het.

Chabane het gesê diegene wat nie deel is van die onderhandelings tussen die vakbonde en die mynbestuur nie, moenie betrokke raak nie.

"Hulle is nie werkers nie en hulle gaan na stakende werknemers en maak allerhande dreigemente. Hulle moet die gevolge dra van wat hulle sê."

Chabane lei die inter-ministriële komitee wat pres. Jacob Zuma aangestel het om die gebeure wat die skietery op 16 Augustus veroorsaak het, te ondersoek.

– Volg Nuus24 op Twitter