Malema 'gereed vir enigiets'
2011-08-29 14:35
Kaapstad – Julius Malema, omstrede leier van die ANC-jeugliga (ANCYL), het Maandag lede van die media in Johannesburg toegespreek oor sy party se beplande tugstappe teen hom.
Die dissiplinêre verhoor teen hom en sy kollegas sal na verwagting Dinsdag afskop.
Volgens Malema sien die ANCYL uit om met leiers van die heersende party te vergader.
Hy het bygevoeg dat die jeugliga so gou moontlik ‘n oplossing wil vind.
“Ons moet 'n oplossing vind wat nie vir die ANC 'n verleentheid sal wees nie,” het hy gesê.
“Ons is nie lafaards nie... Ons bly vreesloos. Ons neem verantwoordelikheid vir ons dade en ons is gereed vir enigiets. Die ANC is in beheer van ons toekoms.”
Malema het ook die geleentheid gebruik om na nasionalisering te verwys.
“Nasionalisering sal nooit verander nie... of jy ons wegjaag of nie...”
Malema het vroeër vandeesmaand gesê het hy het planne om ’n “bevelspan” saam te stel om weerstand te organiseer teen die president van Botswana, Ian Khama, se bewind.
Malema het op die mediakonferensie erken dat hulle deur lede gekritiseer is dat hulle nooit hul verklaring oor Botswana teruggetrek het nie.
Die jeugleier het Maandag bevestig dat adv. Patric Mtshaulana SC die groep sal verteenwoordig.
Malema en sy adjunk, Floyd Shivambu, word daarvan beskuldig dat hulle die ANC se naam deur die modder gesleep het toe hulle onlangs gedreig het om die regering van Botswana omver te werp.
Die Johannesburgse metropolisie het Maandagoggend reeds strate begin sluit in afwagting van lede van die ANCYL wat buite Luthuli-huis sal byeenkom.
Die ander leiers wat aangekla word sluit in Sindiso Magaqa, sekretaris-generaal; Ronald Lamola, adjunkpresident; Pule Mabe, tesourier; en Kenetswe Mosenogi, adjunk- sekretaris-generaal.
– Volg Nuus24 op Twitter.