Malema gekap oor hy skole besoek
2010-01-28 11:23
Johannesburg – Kgalema Motlanthe, die land se adjunk-president het Donderdag die jeugleier Julius Malema se skoolbesoeke gekritiseer, volgens die Sowetan koerant.
“Ons kan nie verwag dat onderwysers en leerders betyds by die skool moet wees om gedurende skoolure toegespreek te word nie. Dit werk nie so nie,” het Motlanthe gesê.
“Dit is ‘n verskoning van mense wat onderrig wil ontwrig, en ons moet dit nie toelaat nie. Skoolhoofde en onderwysers moet dit ook nie as vanselfsprekend aanvaar nie, maak nie saak wie dit is nie.”
Malema het onlangs verskeie skole in Gauteng en die Noordwes besoek.
“Indien die adjunk-president ‘n probleem met die jeugliga het, moet hy met ons daaroor kom praat. Hy het onbeperkte toegang tot ons. Totdat hy dit doen, sien ek nie hoekom ek kommentaar moet lewer op wat hy te sê het nie. Hy is nie die ANC nie,” het Malema teruggekap.
- Sapa