Malema en sakeman is verbind – klagstaat
2012-09-25 18:32
Polokwane – Duidelike sakebande bestaan tussen Julius Malema en die sakeman Lesiba Gwangwa, het die staat Dinsdag in hofdokumente aangevoer.
“Uit dokumentasie van die maatskappy wat as deel van die aansoek ingedien is, is dit duidelik wat daar ‘n sakeverhouding tussen Julius Sello Malema en Gwangwa bestaan, sowel as tussen hul maatskappye/entiteite,” het die klagstaat in ‘n bedrogsaak teen vier van Malema se vennote gelui.
“Volgens die genoemde maatskappystruktuur besit Ratanang Trust en Gwangwa-familietrust elk 50% van Guilder Investments.”
Volgens die hofdokumente is Malema se Ratanang-familietrust ‘n indirekte aandeelhouer in On-Point.
Gwama Propertiers word 100% besit deur Guilder Investment, wat daarop dui dat die Ratanang-trust ‘n indirekte aandeelhouding in Gwama Properties het.
SGL-engineering Project word 70% deur Malema besit en 30% deur Gwangwa.
Segwalo Engineering word 100% deur Gwangwa besit, lui die hofdokumente.
Die direkteur van On-Point, Kagisho Dichabe, en Gwangwa, Makgetsi Manthatha en Helen Moreroa het Dinsdag in die hof verskyn. Hulle is elk op R40 000 borgtog vrygelaat.
Hulle is saam met die maatskappye On-Point, Gwama Properties, Segwalo Engineering en Oceanside Trading aangekla.
Die staat voer aan die die vier wanvoorstellings van hulself aan die departement van paaie en vervoer in Limpopo gemaak het en ‘n kontrak van R52 miljoen is aan On-Point toegestaan.
Die hof het verder gehoor dat nog R1 miljoen aan Kagisho, Gwangwa, Segwalo en On-Point betaal is deur Oceanside, Moreroa en Manthatha.
Die aanklagte van bedrog hou ook verband met ontwerpe wat deur die departement besit word.
Berigte oor die naweek het die openbare beskermer, Thuli Madonsela, aangehaal dat die geskorste leier van die ANC-jeugliga miljoene gemaak het uit die R52 miljoen se tender van On-Point.
Alhoewel Madonsela nie enige bewyse kon vind dat Malema in die tender proses ingemeng het nie, het sy gevind dat hy “onbehoorlik” bevoordeel is uit die kontrak.
Haar ondersoek het gevind dat On-Point korrup opgetree het deur agtereenvolgende kontrakte met subkontrakteurs te teken, het die berigte gelui.
Madonsela het voorgestel dat die tender onmiddellik gekanselleer moet word, dat die Nasionale Vervolgingsgesag en die batebeslagleggingseenheid kriminele aksie oorweeg en dat die meester van die Hooggeregshof die vloei van geld in Malema se trust ondersoek.
Malema sal na verwagting Woensdag om 08:30 in die Polokwane-streekshof verskyn.
Hy staan tereg op aanklagte van bedrog en geldwassery wat verband hou met die On-Point-tender.
– Volg Nuus24 op Twitter
- SAPA
