Malema dreig met oorlog
2009-12-16 07:30
Sarel van der Walt
Pretoria - Terwyl Julius Malema die SAKP gister met “oorlog” gedreig het, het adj.pres. Kgalema Motlanthe dié jeugleier met tugstappe deur die ANC gedreig omdat hy spanning tussen die alliansievennote aanblaas.
’n Strydlustige Malema het gesê as die voorval verlede week toe hy by die SAKP-kongres uitgejou is ’n uitdaging tot oorlog is, sal die jeugliga dié uitdaging aanvaar.
Malema het aan die Nasionale Persklub in Pretoria gesê “ons sal strate toe gaan en veg. As daar geleentheid is om te praat, sal ons, maar as ons slagveld toe moet gaan, sál ons. Daar is geen rose in ’n oorlog nie.”
Tog het hy gesê daar is geen fundamentele wedywering in die ANC-SAKP-Cosatu-alliansie nie.
“As die SAKP my om verskoning vra, kan ons weer om ’n tafel gaan sit, praat en saam Coke drink. Maar hulle sal nie, want hulle het die uitjouery beplan.”
Hy het gesê senior SAKP-lede op die verhoog het saamgesing toe die afgevaardigdes anti-Malema-liedjies gesing het.
Malema het Gwede Mantashe, nasionale SAKP-voorsitter asook sekretaris-generaal van die ANC, opnuut van swak leierskap beskuldig omdat hy, as iemand wat ’n senior pos in albei partye beklee, nie die uitjouery veroordeel het nie.
Malema het ontken hy het gesê hy sal toesien dat Mantashe in 2012 nie vir ’n tweede termyn tot sekretaris-generaal verkies word nie. “Ons sal eers nader aan die tyd ’n besluit neem.”
Intussen het Motlanthe Malema gister met tugstappe gedreig omdat hy ’n opdrag van die party se nasionale uitvoerende komitee (NUK) verontagsaam het om nie verdeeldheidsvure tussen die alliansievennote aan te blaas nie, berig Cobus Coetzee uit Johannesburg.
“Niemand verset hulle teen die ANC en kom daarmee weg nie,” het Motlanthe gewaarsku oor nog ’n voortslepende woordestryd tussen die ANC-jeugliga en die SAKP nadat Jeremy Cronin, adjunk-hoofsekretaris van die SAKP, Malema oor die nasionalisering van myne aangevat en Malema hom ’n “wit Messias” genoem het. Die ANC-jeugliga het gedreig hy sal Cronin ’n les leer en het beweer dr. Blade Nzimande, SAKP-leier, wil Motlanthe se pos in 2012 oorneem.
Motlanthe het gesê tugstappe teen Cronin én Malema word oorweeg. “Dissipline kan nie selektief toegepas word nie. Nie Cronin óf Malema moet as NUK-lede in die openbaar so baklei nie.”
Motlanthe het ook die SAKP se uitjouery van Malema as onvanpas beskryf.
Die NUK het gister ’n verslag oor die struwelinge aangevra, wat vroeg Januarie klaar moet wees. Motlanthe het gesê hy is seker tugprosedures sal in die verslag aanbeveel word.
Hy het beklemtoon die ANC sal nie sy rug op Malema keer nie en sal hom eerder “slyp en korrigeer” en “ ’n beter burger en leier” maak. Volgens hom verlaat die ANC slegs diegene wat nie geslyp kan word nie.
- Die Burger