Malema dreig met ontwrigting by optogte
2011-10-20 08:04
Johannesburg – Die ANC-jeugliga en sy ondersteuners beplan maksimum ontwrigting in Pretoria en Johannesburg tydens sy massa-optogte volgende week.
Hulle sal verkeer ontwrig en by die Uniegebou in Pretoria slaap totdat die regering aan hul eise voldoen, het Julius Malema, ANC-jeugleier, Woensdag te midde van luide toejuiging in Thembelihle in Lenasia gesê.
Hy het inwoners van die township, waar verlede maand gewelddadige diensleweringsbetogings was, tydens ’n blitsbesoek vir die jeugliga se massa-optog gemobiliseer. Die jeugliga gaan volgende Donderdag by Beyers Naudé-plein in Johannesburg bymekaarkom en na die Kamer van Mynwese, die Johannesburgse Effektebeurs en die Uniegebou in Pretoria opruk om die nasionalisering van myne en die herverdeling van die land se rykdom te eis.
’n Nagwaak sal Donderdagaand by die Uniegebou gehou word.
Hulle dring aan op onder meer gratis onderrig, werk vir die jeug en ekonomiese bevryding.
“Ons moet swart mense weer waardigheid gee. Solank ons in die donker is, sonder water en elektrisiteit moet klaarkom en in plakkershutte woon, is ons nie vry nie,” het Malema, geklee in ’n kleurryke Karibiese hemp en Che Guevara-baret, gesê.
“Nie net julle raadslede nie, maar die hele wêreld, selfs Amerika, moet weet van die probleme hier en die omstandighede waarin julle woon.”
Van die oomblik toe hy in sy wit Range Rover in die armoedige township stilgehou het, het sowat 500 inwoners – jonk en oud – gestamp en gestoot om Malema van naderby te sien. Hy het gesê die ANC-jeugliga gaan busse na Thembelihle stuur om die inwoners na die optog aan te ry.
Die optog gaan nie in agterstraatjies plaasvind nie, maar op groot paaie soos die N1 sodat die verkeer ontwrig kan word en almal van die optog bewus kan wees, het Malema gesê.
Malema het die skare “Shoot to kill, kiss the boer, kiss the farmer”, laat sing terwyl kinders op hul ouers se skouers getel is om ook te sien hoe die omstrede jeugleier lyk. “Julle pyn is ons pyn,” het Malema die mense verseker.
– Volg Nuus24 op Twitter
- Beeld