Malema doen SA skade aan, sê VF+
2010-04-12 15:39
Johannesburg - “Die skade wat Julius Malema Suid-Afrika in die buiteland aandoen, kan nie in geld bereken word nie,” het dr. Pieter Mulder, leier van die VF Plus en adjunkminister van Landbou, Bosbou en Visserye, gesê.
Mulder het sopas van ’n besoek in die buiteland teruggekeer.
“Buitelandse media is nog altyd geneig om eensydig en sensasioneel oor Suid-Afrika te berig. Malema se onverantwoordelike optrede speel in hulle hand en bevestig elke eensydige stereotipe wat die buiteland oor Suid-Afrika en sy mense het,” het hy gesê.
“Van hierdie stereotipes is ’n onverdraagsaamheid teenoor Westerse joernaliste omdat die Weste steeds die grootse vyand van Afrika en alle swart mense is. Ook dat swart en wit mekaar in Suid-Afrika haat en permanent in konflik met mekaar is.”
Mulder beplan om hierdie en verskeie ander sake wat die huidige klimaat in Suid-Afrika veroorsaak, met president Jacob Zuma te bespreek.
“Dit is dringend nodig dat wyse en gebalanseerde ANC-leiers nou na vore tree en ’n meer gebalanseerde prentjie van Suid-Afrika illustreer. In hierdie verband verwelkom die VF+ pres. Zuma se opmerkings dat die ANC intern na uitlatings van hulle leiers, waaronder Malema, gaan kyk.”
“Dit is ’n kwade dag as die ANC se interne spanninge, en die werf van stemme op die goedkoopste wyse met die oog op die komende plaaslike verkiesing, sou maak dat die ANC die party se belange bo die belange van Suid-Afrika stel,” het Mulder bygevoeg.
- Nuus24