Malema dink drank is 'n euwel
2009-12-02 06:39
Rajaa Azzakani
Philippi - Julius Malema, leier van die ANC-jeugliga, wil hê drankadvertensies moet verbied word “omdat dit tot onbeskermde seks lei”.
Malema het Dinsdag, op Wêreldvigsdag, hier gesê bruin en swart inwoners van die Wes-Kaap moet saamstaan om die ANC te herbou.
“Die provinsie is onder die verkeerde leierskorps. Julle moet spyt wees dat julle nie vir die ANC gestem het nie en julle moet julself daartoe verbind om nooit teen die ANC te stem nie. Helen Zille (die DA-leier en Wes-Kaapse premier) gee nie vir julle om nie.”
Die jeugliga het ’n skenking van R100 000, kospakkies en komberse aan die Sinethemba Hope-weeshuis gedoen. Dié tehuis verskaf kos aan die arm gemeenskap van Heinz Park.
Malema het gesê drankadvertensies leer jong mense om alkohol op ’n vroeë ouderdom te gebruik.
“Dit laat jou glo om alkohol te drink, maak jou belangrik en spesiaal.
“Alkohol, dwelms en dagga vernietig die toekoms van ons kinders.
“Baie mense wat onbeskermde seks het, doen dit terwyl hulle onder die invloed van drank is. Dit is waarom ons alkohol móét beveg. Dit lei tot onverantwoordelike besluite.”
Volgens hom is baie mense wat vroue en kinders mishandel onder die invloed van alkohol en dwelms.
Met verwysing na Vrydag se finale 2010-loting het Malema gesê: “Die wêreld kan nie na ’n gemeenskap kom wat verslaaf is aan dwelms en alkohol of wat besig is om van MIV/vigs te sterf nie.”
Hy het gepleit dat veral jong mense altyd kondome moet gebruik en ’n beroep op mense gedoen om nie hul seksmaats te verkul nie.
Ouers moet ook met hul kinders oor seks praat.
Malema het verder gesê MIV-positiewe mense moet beskerm eerder as geïsoleer word.
Die stigma rondom die siekte moet afgebreek word.
- Die Burger