Malema dalk teen naweek in boeie
2012-09-18 07:31
Video - Valke ondersoek Malema
Die Valke het bevestig dat Julius Malema ondersoek word vir die rol wat hy moontlik gespeel het in onrus by Suid-Afrikaanse myne.
KYK
Kaapstad – Julius Malema, geskorste president van die ANC-jeugliga (ANCYL), kan moontlik voor die einde van die week in hegtenis geneem word, het Eyewitness News (EWN) Dinsdagoggend berig.
Dit volg ná die Valke se ondersoek oor bewerings van korrupsie teen Malema ten einde geloop het.
Malema het na bewering gedurende sy ampstermyn as president van die ANCYL verskeie sakemanne van Limpopo gehelp om tenders te wen.
EWN het bevestig dat die Valke se ondersoek oor Malema se Ratanang Familietrust, belastingonreëlmatighede en bewerings van tenderbedrog teen hom, amptelik voltooi is, en dat Malema moontlik al voor die einde van die week in hegtenis geneem kan word.
Die Valke het intussen ook gesê die polisie se speureenheid het die ondersoek oorgeneem na bewerings van aanhitsing tot geweld wat teen Malema gemaak is deur die vakbond Solidariteit.
Malema is Maandag toegang geweier tot ‘n byeenkoms waar mynwerkers in die Noordwes ingelig is oor verwikkelinge rakende hul eis vir beter lone.
Die polisie het Malema by die hek van die Wonderkop-stadion voorgekeer, waar die werkers vergader het vir die inligtingsessie.
Ná ‘n lang gesprek het Malema weggery. Hy is deur sowat 10 polisievoertuie vergesel.
– Lees hier meer.
– Volg Nuus24 op Twitter.
