Malema binnekort vir haatspraak verhoor
2011-11-28 08:05
Johannesburg – Die Suid-Afrikaanse Menseregtekommissie se verhoor van Julius Malema vind Maandag en Dinsdag in Braamfontein plaas.
Die verhoor volg op drie haat-spraak-klagtes wat die Afrikanerbond (AB) teen Malema ingedien het, asook nog sowat 500 ander klagtes wat ander partye by die kommissie ingedien het.
Volgens Jan Bosman, hoofsekretaris van die AB, het die organisasie op 10 Maart verlede jaar ’n klag teen Malema ingedien nadat in die media berig is oor die “dubulu iBhunu”- (“Skiet die boer”-) lied wat hy as president van die ANC-jeugliga (ANCJL) gesing het.
Daarna het Malema dit weer op 22 Maart 2010 op ’n openbare vergadering in Mafikeng gesing. Op 23 Maart 2010 het die AB nog ’n klag by die menseregtekommissie ingedien.
Op 13 April 2010 het hy ’n derde klag teen Malema ingedien weens sy tirade op 8 April 2010 teenoor ’n korrespondent van die BBC, Jona Fisher.
Tot dusver is altesame 510 klagtes teen Malema by die MRK ingedien deur organisasies wat georganiseerde landbou en politieke partye insluit. Pieter Vorster, voorsitter van die AB, sal namens die organisasie ’n voorlegging by die verhoor doen.
– Volg Nuus24 op Twitter
- Beeld