Malema benadruk oproep vir nasionalisering
2012-09-19 10:45
Johannesburg – Julius Malema het kritici van die nasionalisering van myne vergelyk met diegene wat die einde van apartheid teengestaan het.
John Robbie, aanbieder van Talk Radio 702, het Malema Woensdag gevra hoe die nasionalisering van myne kan plaasvind en of dit aanneemlik is.
“Jy klink soos mense wat ons stryd vir vryheid teengestaan het,” het Malema geantwoord.
“Jy redeneer presies soos hulle redeneer het, dat ons nie die ekonomie kan bestuur nie... ek sê vir jou dit kan moeilik klink, tot dit gedoen is.”
Malema sê die regering moet “nie noodwendig” myne onteien nie, maar moet Botswana eerder as ‘n model gebruik, waar die staat 51% se aandele in die myne besit het.
“Hoekom het julle nie ‘n probleem met Botswana nie? [Mynmaatskappye] is meer as bereid om met die regering in Botswana te werk, maar as hulle hierheen kom, weier hulle,” het Malema gesê.
“Ek vra nie vir algehele nasionalisering nie. Ons moedig steeds die betrokkenheid van die privaatsektor aan. Ons praat van meer beheer en deelname van die staat in die ekonomie.”
Malema het ook gereageer op berigte dat die Valke hul korrupsie-ondersoek in hom voltooi het en dat hy binnekort in hegtenis geneem gaan word.
Hy sê hy is nie bewus van enige voorneme om hom in hegtenis te neem nie.
“Ek hoor dit by jou aan die begin van die program. Ek hoor daarvan in die koerante,” het Malema gesê.
“Ek word al sedert 2009 ‘in hegtenis geneem’,” het hy gesê.
Malema sê as die polisie hom in hegtenis wil neem, hoef hulle nie ‘n “onnodige bohaai op te skop nie”.
– Volg Nuus24 op Twitter
- SAPA
