Malema-appèl geheimsinnig, kalm
2012-01-24 08:00
Johannesburg – Die eerste dag van Julius Malema, geskorste ANC-jeugleier, se appèl teen sy skorsing uit die jeugliga én die ANC, het Maandag agter geslote deure plaasgevind met ANC-woordvoerders wat nie wou sê hoe die proses vorder nie.
Talle lede van die media het buite Luthuli-huis, die ANC se hoofkantoor in die Johannesburgse middestad, saamgedrom, maar in teenstelling met die eerste dag van Malema se tugverhoor in September was die strate voor Luthuli-huis kalm en sonder enige jeugliga-ondersteuners.
Net Golden Miles Bhudu, leier van die Corrections and Civil Rights Movement, het oudergewoonte in ’n stukkende denimbroek en kettings sy steun aan Malema toegesê.
“Kameraad Cyril, doen die regte ding. Hier is geen saak nie, net boeie,” was die woorde op sy plakkaat.
Cyril Ramaphosa is die voorsitter van die ANC se nasionale appèlkomitee voor wie Malema Maandag die eerste keer verskyn het nadat die ANC se nasionale tugkomitee (NTK), onder leiding van Derek Hanekom, hom in November geskors het.
Adv. Patric Mtshaulana SC, Malema se regsverteenwoordiger, het verlede Maandag die betooghoofde in Malema se appèlsaak ingedien.
Daarin voer Malema aan die jeugligalede is nie die kans gegun om versagtende omstandighede aan die NTK voor te lê nie.
Hy beweer ook Hanekom en Susan Shabangu, minister van minerale hulpbronne en ’n komiteelid, was nie objektief nie en daarom behoort sy saak hersien te word.
Keith Khoza, woordvoerder van die ANC, het gesê hy kan nie kommentaar lewer oor die proses nie. “Die media sal inligting ontvang wanneer die verhoor afgehandel is.”
Volg Nuus24 op Twitter
- Volksblad