Malema: Zuma sal namens my praat
2012-01-06 19:09
Thabu Nchu – Die geskorste president van die ANC-jeugliga, Julius Malema, het Vrydag gesê dit pla hom nie dat hy nie oor die naweek ‘n kans gaan kry om by die ANC se eeufeesvieringe in Bloemfontein te praat nie.
“Ek is nie hier om te praat nie... President Zuma sal namens ons almal praat. Hy is gekies, of ons van hom hou of nie,” het hy aan ‘n skare mense by die Moroka-laerskool in Thaba Nchu in die Vrystaat gesê.
Die ANC se voorsitter, Baleka Mbete, het Woensdag aan verslaggewers gesê dat Malema nie Sondag ‘n beurt by die podium sal kry wanneer Zuma sy jaarlikse 8 Januarie-toespraak in Bloemfontein gaan maak nie.
Mbete het gesê dat alle boodskappe van ondersteuning, insluitende Malema s’n, in ‘n boekie saamgevat sal word wat aan die 100 000 mense wat daar verwag word uitgedeel sal word.
Malema het vir die eerste keer in die openbaar na Zuma as “stort-man” verwys by die ANC se konferensie in Limpopo in Desember 2011.
Voordat Malema Vrydag in Thaba Nchu aangekom het, het ‘n groep jongmense by die skool die “stort-liedjie” gesing.
Sommige van die jeugliga se leiers, insluitende die geskorste sekretaris, Sindiso Magaqa, het eers ‘n sirkel gevorm en die groep toe in sang gelei.
"Malema re rapedise rea e sokolela. Shawara ya re sokodisa," het hulle gesing.
Dit kan vertaal word as: “Malema bid vir ons, ons ly. Die stort-man gee vir ons probleme.”
– Volg Nuus24 op Twitter
- SAPA