Malema: Regering het teen sy mense gedraai
2012-08-23 16:56
Rustenburg – Die regering het niks gedoen vir die 34 mynwerkers wat in Marikana dood is nie, het die geskorste leier van die ANC-jeugliga, Julius Malema, Donderdag gesê.
“Ons mense sal onder demokrasie beskerm word, maar die regering het teen sy mense gedraai,” het Malema gesê tydens ‘n gedenkdiens vir die mynwerkers wat tydens ‘n skietery met die polisie in Marikana in die Noordwes dood is.
Hy het lede van die regering daarvan beskuldig dat hulle die gedenkdiens slegs bywoon om voor die nuuskameras te verskyn.
Hy het die sakeman Cyril Ramaphosa arrogant genoem nadat sy beleggingsmaatskappy, Shanduka, Saterdag bekendgemaak het hy sal R2 miljoen skenk vir die mynwerkers se begrafnis.
“Hy is soos, ons sal julle vermoor en betaal vir jul begrafnisse,” het Malema gesê.
“Die regering het nie daarin geslaag om betrokke te raak nie, want hulle is betrokke by die myn. Hierdie is ‘n myn-rewolusie en ons sal nie opgee nie.”
Die skare het Malema toegejuig terwyl hy gepraat het.
– Volg Nuus24 op Twitter
- SAPA
