Malema: Nou gaan ek sakewêreld betree
2010-02-25 06:41
Waldimar Pelser
Johannesburg - Nou gaan Julius Malema éérs daai miljoene begin jaag.
Die leier van die ANC-jeugliga het sy amptelike toetrede tot die sakewêreld gisteroggend vurig aangekondig ’n dag nadat pres. Jacob Zuma gesê het dit skeel hom min waar en hoe Malema sy geld maak.
“Ek gaan nou begin sake doen. Ek moet die jeug in die sakewêreld lei,” het Malema in ’n onderhoud op die program Morning Live op SABC2 gesê.
Beeld het gister berig Malema het in Mei 2007 ’n huis van R1 miljoen in Polokwane kontant gekoop en verlede jaar ’n deposito van meer as R2 miljoen neergesit op nog ’n huis in Sandton.
Op ’n mediakonferensie Dinsdag het hy uitgevaar teen die media se gekrap aan sy geldsake.
“Ek het onbeperkte toegang tot Zuma. Ek is vriende met al die premiers. Ek is na aan al die ministers,” het hy toe gesê.
Gerugsteun deur dié netwerk loop hy die sakewêreld nou openlik tromp-op. Sy hoofbeswaar: Sodra ’n swart jongmens sake doen, dink mense hulle is korrup.
“Ek is nie korrup nie. Selfs al wou ek wees, het ek nie die mag om te sê waarheen tenders moet gaan nie. Ek is ook nie ’n openbare ampsdraer nie, en ek sal dit nie binne die volgende 15 jaar wees nie. Maar dit is ’n voorbeeld van skynende swart diamante wat aangeval word. Ek moet die vertroue van die jeug van Suid-Afrika herstel deur die sakewêreld te betree.”
Jan Taks is welkom om sy geldsake te bekyk, maar dié gesprek is privaat, het hy gesê.
- Beeld