Malema: 'Grondhervorming sal eenheid bring'
2011-08-02 11:03
Kaapstad – Julius Malema, leier van die ANC-jeugliga (ANCYL), sê grondhervorming sal eenheid in Suid-Afrika bewerkstellig.
Malema het Dinsdagoggend dié uitlatings tydens ‘n onderhoud met die omroeper Redi Tlhabi op Talk Radio 702 gemaak.
Hy het hom oor onder andere grondhervorming en nasionalisering uitgespreek.
Malema het grondhervorming voorgehou as ‘n manier om eenheid in die land te bewerkstellig.
"Die eenheid van ons mense is baie belangrik. Eenheid is een van die sleutelbeginsels van die ANC. Met die stand van sake nou is ons nie een nie.
“Ons is op ekonomiese vlak geweldig verdeeld. Jy het die wat het, en die wat nie het nie. Hierdie ekonomiese ongelykhede is wat ons verdeel," het hy gesê.
"Ons móét grond afneem ter wille van ons mense. Jy neem nie net 'n Afrikaner se plaas so af en laat dit vergaan nie. Wanneer jy grond het en daar moet huise gebou word, en daardie grond word besit deur iemand wat weier om dit te verkoop, dan moet die regering die grond kan terugneem sonder vergoeding. Jy moet in staat wees om dit te kan terugneem."
Hy meen “koloniseerders en setlaars” het grond by die oorspronklike eienaars gesteel.
“Om te wil voorstel dat dit nie op 'n gewelddadige manier gebeur het nie is onwaar. Daar is slawe van grondeienaars gemaak. En die mense wat die grond afgeneem het vind steeds baat daarby."
‘n Luisteraar het tydens die program ook ingebel en hom gevra of hy homself as ‘n kapitalis beskou.
"Ek is nie een nie. Kapitaliste is mense wat die bron van produksie besit. Ek besit nie die bron van produksie nie, so hou jou feite korrek,” het hy geantwoord.
Volg Nuus24 op Twitter.
- Nuus24