Malema: ANCYL gaan veg vir Semenya
2009-10-24 22:14
Johannesburg- Die president van die ANC-jeugliga, Julius Malema het gesê dié organisasie gaan 'n veldtog voer vir Caster Semenya om as "'n vrou deel te neem".
Malema het Saterdag gepraat by die ANCYL se 65de herdenkingsdinee by die Johannesburgse buiteklub.
Dié dinee het Semenya, Khotso Mokoena en Mbulaeni Mulaudzi vereer vir die medaljes wat hulle by die Wêreldkampioenskappe wat vroeër vanjaar in Berlyn gehou is, gewen het.
Politici soos Winnie Madikizela-Mandela en Matthews Phosa het ook dié dinee bygewoon.
"As ons namens Caster praat, is dit nie oor haar nie, maar oor die behandeling wat vroue in landelike gebiede kry. Mense kyk neer op hulle," het Malema gesê.
'n Charismatiese Malema het die "mediahuise wat deur buitelanders besit word" gelooi vir die negatiewe berigte wat hulle oor Semenya gepubliseer het.
Oor The Star het hy gesê die rede hoekom hulle negatiewe berigte oor die ANCYL publiseer, is omdat hulle geen belangstelling in Suid-Afrika het nie.
"Hulle is nie van hier nie. Hulle gee nie om nie," het hy gesê met verwysing na die koerant se Ierse eienaarskap.
Malema het gespot en gesê die regering is 'n sub-komitee van die ANCYL en dat hy glo die Bafana-breier 'n Suid-Afrikaner moet wees.
– Sapa