Malema 'ANC se monster'
2011-06-21 08:09
Charles Smith en Karen Ebersohn
Bloemfontein – Die ANC het in Julius Malema ’n monster grootgemaak wat hy nie kan beheer nie, is die reaksie oor die ANC-jeugleier se dreigemente om plase te gryp en banke en myne te nasionaliseer.
Terwyl Suid-Afrika se “eie Robert Mugabe” se dreigemente boere en politici laat rooi sien, het ’n ekonoom Suid-Afrikaners gerusgestel dat Malema nie alleen die Grondwet kan ophef nie.
Malema is nie geregtig op sy eie feite nie en kan nie die geskiedenis van die land herskryf nie, het dr. Roelof Botha, ekonomiese raadgewer van PricewaterhouseCoopers (PwC) en gewese ekonoom van die jaar van Sake24, gesê.
“Die Suid-Afrikaanse regering bly verbind tot ’n vryemark-ekonomie en sal wesenlike veranderings aan die Grondwet moet aanbring om dié benadering te verander. Geen rede bestaan om te vermoed dat die kabinet so ’n drastiese stap sal oorweeg nie.”
Botha sê dreigemente deur enige nie-parlementêre organisasie (soos die ANC-jeugliga) behoort nie ’n noemenswaardige nadelige uitwerking vir die land in te hou nie.
“Indien die regering self met sulke dreigemente vorendag kom, kan dit aansienlike skade aan Suid-Afrika se beeld as ’n stabiele vryemark-demokrasie berokken.”
Voorts sê hy Suid-Afrikaners hoef nie oor die toekoms van die land te vrees nie.
Dr. Pieter Mulder, leier van die VF+, het aan Volksblad gesê hy het by verskillende geleenthede in die kabinet én in kabinetskomiteevergaderings beswaar gemaak oor dié uitsprake. “By die eerste moontlike geleentheid sal ek dit weer doen.”
Toe pres. Jacob Zuma op 10 Junie met opposisieleiers gepraat het, het hy (Mulder) weer hieroor gepraat “en oor die polarisering wat dit veroorsaak”.
Henk Vermeulen, hoofbestuurder van Vrystaat Landbou (VL), sê die VL distansieer homself in totaliteit van die radikale uitlatings wat Malema gemaak het.
“Die dag- en uitvoerende bestuur van die VL vergader later die week en die saak sal bespreek word.”
Jan van Niekerk, jeugleier van die VF+, sê die feit dat die ANC en president Jacob Zuma nie vir Malema gedissiplineer het nie, het sy nuutste uitsprake en optrede tot gevolg.
“Die ANC het ’n monster grootgemaak wat hulle nie kan beheer nie.”
Hy sê die jeugliga se radikale denkwyse ten opsigte van die nasionalisering van banke en myne en die verregaande hantering van die grondvraagstuk, is niks anders as ’n Robert Mugabe-benadering nie.
Helen Zille, die leier van die DA, het op Twitter gesê:
“Ek het ’n tsoenami-navrae oor Malema ontvang. My kommentaar is om nie bekommerd te wees nie. Malema is ’n nodige katalisator van die politiese herskikking in Suid-Afrika.”
Crawford von Abo van Bothaville, wat R700 miljoen se plase en bates in Zimbabwe verloor het, het gesê in Zimbabwe was daar nie probleme nie tot die mense se politieke mag aangetas is. “Toe sê pres. Robert Mugabe presies dieselfde ding as Malema nou. Dis ’n lelike ding. As Malema só die mense opstook, gaan hy onkeerbaar word. Hulle (mense soos Malema) breek die gesindhede af. Dit is anargie. Gematigde ouens moet wakker word.”
Charles Matorera, leier van die Zimbabwiese Beweging vir Demokratiese Verandering (MDC) in die Vrystaat, se reaksie is: “Malema droom!”
“My advies aan boere is om te begin praat. Gebruik ons Zimbabwiërs wat tussen die Suid-Afrikaners woon om aan hulle te vertel wat gaan gebeur as Malema begin plase gryp. Hy gaan wen, maar Suid-Afrika se mense gaan verloor.”
Volg Nuus24 op Twitter
- Volksblad