'Mak' tier bespring seun (5)
2011-07-19 09:08
Polokwane - ’n Vyfjarige seun van Johannesburg het die naweek ternouernood aan die dood ontkom toe ’n jong Bengaalse tier hom in ’n luukse private wildreservaat in Limpopo bespring het.
Die ses maande oue tier het sy pote weerskante om Finlay Holden se kop ingekap in die Zebula Golf Estate & Spa sowat 50 km buite Bela-Bela (Warmbad). Finlay is Maandag uit die Mediclinic Sandton ontslaan.
Hy het verskeie byt- en krapwonde aan die kop opgedoen.
Claire Holden, sy ma, het gesê sy, haar driejarige dogter, Hannah, en Finlay het Saterdagoggend na die twee mak tiere voor die klubhuis gaan kyk.
Zebula het glo die versekering gegee die tiere hou geen gevaar vir mense in nie.
Op Zebula se webwerf word die interaksie met die twee Bengaalse tiers Reno en Paris geadverteer. “Jy sal aan die Bengaalse tiere kan vat en ook jou foto saam met hulle neem.”
“Ek het vir Finlay gesê hy moet versigtig wees, want alle diere bly maar wild,” het mev. Holden gesê.
Finlay het oor een van die tiere se rug gestreel toe die tier skielik omdraai en hom bespring. “Die tier se twee pote was weerskante van sy kop. Die dier se bek was oopgesper oor sy kop,” het mev. Holden gesê.
Finlay het histeries gegil. Sy ma het met kaal hande die tier van haar seun probeer afkry.
Jeff Cawood van Pretoria, wat saam met sy gesin op ’n wildbesigtigingsrit sou gaan, het dadelik gaan help.
Ronell Cawood het gesê hulle het gille gehoor. Sy het minute voordat die tier Finlay bespring het, nog foto’s van die dier geneem. Volgens haar het die tiere gegrom.
“My man het die tier om sy nek beetgekry en met sy duime oor sy keel gedruk sodat hy moes laat gaan.”
Mnr. Cawood het ’n skraap op die een hand opgedoen.
Mev. Holden het gesê Finlay het aanhou skree: “Ma, laat dit ophou, laat dit ophou!”
Werknemers van Zebula het blykbaar met hul tweerigtingradio’s die tier begin takel.
Mnr. Cawood het die tier van Finlay afgetrek.
Jonathan Holden het gholf gespeel op die reservaat toe sy seun aangeval is.
Mev. Holden het gesê: “My kind en ek was vol bloed. My arme dogtertjie het alles gesien.”
Sy is baie ontsteld omdat daar geen mediese personeel aan diens by Zebula was nie.
Volgens haar het die personeel by Zebula aan haar gesê om self met Finlay na Bela-Bela te ry vir mediese hulp. Sy was te geskok.
’n Ambulans is van Bela-Bela ontbied. Finlay is na die St. Vincent- private hospitaal op Bela-Bela vervoer.
Hy is later die dag na die Muelmed-hospitaal in Pretoria oorgeplaas. Die Holdens het besluit om hom eergister na die Mediclinic Sandton te skuif. Hy het Sondagaand ’n operasie ondergaan om die wonde skoon te maak en ontvang hoë dosisse antibiotika. Hy het ook ’n magdom steke gekry.
Hayley Poole, lid van die bestuurspan by Zebula, het Maandag gesê hulle wil geen kommentaar lewer nie.
- Volksblad