Majali 'n onskuldige slagoffer, sê ANC-hoë

2010-12-30 22:43

Johannesburg - Die sakeman Sandile Majali is vervolg vir sy onselfsugtige bydrae tot die ANC, het Ngoako Ramatlodi, Majali se vriend en ook 'n lid van die ANC se nasionale uitvoerende komitee, Donderdag gesê.

"Sandi is 'n voorbeeld van wat openbare opinie aan iemand kan doen," het Ramatlodi by 'n gedenkdiens vir Majali in die Bryanston Metodistekerk in Johannesburg gesê.

"Hy het tereggestaan en is skuldig bevind in die hof van openbare opinie."

Volgens Ramatlodi was Majali se grootste sonde dat hy die ANC ondersteun het en ook 'n suksesvolle sakeman was.

"Daar is mense wat wens hulle kon hier wees, maar hulle is bang dat hulle in die hof van openbare opinie sal verskyn. Hulle huil eerder stilweg in hulle eie hoekies," het Ramatlodi gesê.

Majali het ook gesê die ANC is nie skaam om met Majali verbind te word nie.

Die 48-jarige Majali is Sondagoggend in sy kamer in die Sandton Quatermain-hotel in Johannesburg dood gevind.

Die gedenkdiens is bygewoon deur verskeie ander senior lede van die ANC, insluitend die adjunk-minister van toerisme, Thokozile Xasa.

- Volg Nuus24 op Twitter

- SAPA