Maharaj, vrou ontken bewerings van korrupsie
2013-02-01 11:07
Johannesburg – Mac Maharaj, presidensiële woordvoerder, en sy vrou, Zarina, het 'n bewering ontken dat hulle gunslone ontvang het vir 'n tender vir nuwe rybewyse wat in die 1990's toegeken is.
Die paartjie se prokureurs het ook die Mail & Guardian se motiewe bevraagteken omdat hulle die bewering, wat Shirene Carim, Maharaj se skoonsuster, gemaak het, gepubliseer het. Carim se motief vir die "onthullings" is ook bevraagteken.
Carim het die koerant vertel van 'n Switserse bankrekening waarin die gunslone vir 'n kontrak vir nuwe rybewyse glo betaal is.
Maharaj se prokureurs het aan die koerant gesê dit is nie die eerste keer wat die bewering gemaak word, maar dat dit nie voorheen gepubliseer of daarop gereageer is nie.
"Verantwoordelike joernalistiek vereis van jou om die valse en ongetwyfeld ongestaafde bewerings in dieselfde lig te behandel," het Rudi Krause, direkteur van BDK Attorneys, in 'n reaksie aan die joernalis Sam Sole gesê.
Carim het inligting bekend gemaak van 'n beweerde Switserse bankrekening waarin Maharaj glo gunslone gedeponeer het ná die instelling van Suid-Afrika se kredietkaartstyl-rybewysstelsel.
Die Skerpioene het die beweerde misdaad in 2009 ondersoek, maar die aanklagte teen Maharaj, die destydse minister van vervoer, is laat vaar.
Carim het die koerant vertel van 'n reis na Genève, waar 'n rekening in die 1990's oopgemaak is en hoe die omstrede sakeman Schabir Shaik na bewering verantwoordelik was vir die verskaffing van die geld.
– Volg Nuus24 op Twitter
- SAPA
