Maharaj ontken bewerings van korrupsie
2011-11-22 13:46
Pretoria – Mac Maharaj, presidensiële woordvoerder, het op 'n mediakonferensie ontken dat hy by korrupsie en omkopery betrokke is.
Maharaj het op ’n nuuskonferensie van die Nasionale Persklub in Pretoria gesê hy het nooit enige wet verontagsaam nie.
Hy het reageer op kritiek dat hy in effek sensuur op die Mail & Guardian toegepas het deur die koerant te verhoed om die bewerings teen hom te publiseer.
Maharaj het gesê hy het bewyse dat die Mail & Guardian 'n kriminele oortreding begaan het.
"Ek het gedoen wat die wet sê, ek het 'n klag ingedien."
Prokureurs van Maharaj het klagtes teen Sam Sole, Stefaans Brümmer en die Mail & Guardian ingedien nadat hulle artikel 41 (6) van die Wet op die Nasionale Vervolgingsgesag van 1988 verontagsaam het.
Die aanklagte hou verband met verlede Vrydag se uitgawe van die koerant. Op die voorblad van die koerant was ‘n foto van Maharaj langs die woorde: "Gesensor. Ons kan hierdie storie nie volledig publiseer nie as gevolg van 'n dreigement van kriminele vervolging."
Maharaj het die polisie gevra om ondersoek in te stel na die moontlike diefstal van rekords van NVG-ondersoeke.
Dít kom nadat die NVG ontken het dat hulle reg gestaan het om Mail & Guardian en sy joernaliste te vervolg vir die besit van dokumente wat met ’n seksie 28-ondersoek na Maharaj te make het.
Die seksie 28-ondersoek berus daarop dat getuienis wat Maharaj, voormalige minister van vervoer, in ’n destydse Skerpioene-ondersoek gelewer het, geheim moes bly. Hy is ondervra as deel van ’n korrupsie-ondersoek.
Maharaj het Dinsdag gesê die koerant moes die direkteur vir openbare vervolging nader voor hulle hom genader het om die storie te publiseer.
Hy het gesê hy het geweier om vrae te beantwoord omdat hy glo 'n hof moet besluit of hy verkeerd opgetree het.
Hy het gesê is nie bereid om homself te onderwerp aan 'n "verhoor deur die media" nie.
Maharaj is Sondag in die Sunday Times daarvan beskuldig dat hy en sy vrou, Zarina, tussen 1997 en 1999 omkoopgeld van sowat R2,3 miljoen van ’n Franse wapenvervaardiger, Thales, ontvang het.
Hy het gesê die koerant het 800 woorde gepubliseer, maar slegs een van sy drie sinne van sy antwoorde op die koerant se vrae gebruik.
– Volg Nuus24 op Twitter
- SAPA