'Maharaj moet geskors word' – DA
2013-02-01 17:30
Johannesburg – Pres. Jacob Zuma moet sy woordvoerder, Mac Maharaj, skors, het die Demokratiese Alliansie gesê.
Dit volg ná ‘n berig in Mail & Guardian wat beweer dat die woordvoerder en sy vrou uit ‘n rybewys-kaartkontrak voordeel getrek het.
“Die presidensie kan nie aanhou funksioneer met ‘n woordvoerder wie se geloofwaardigheid bevraagteken word nie,” het Mmusi Maimane, nasionale woordvoerder vir die DA, gesê.
Maimane het bygevoeg dat die openbare beskermer die bewering moet ondersoek.
Maharaj en sy vrou, Zarina, het die bewering dat hulle gunslone ontvang het vir 'n tender vir nuwe rybewyse wat in die 1990's toegeken is, ten sterkste ontken.
Die paartjie se prokureurs het ook Mail & Guardian se motiewe bevraagteken omdat hulle die bewering, wat Shirene Carim – Maharaj se skoonsuster – gemaak het, gepubliseer het.
Haar motief vir die "onthullings" is ook bevraagteken.
Carim het die koerant vertel van 'n Switserse bankrekening waarin die gunslone vir 'n kontrak vir nuwe rybewyse glo betaal is.
Maharaj se prokureurs het aan die koerant gesê dit is nie die eerste keer wat die bewering gemaak word, maar dat dit nie voorheen gepubliseer of daarop gereageer is nie.
Volg Nuus24 op Twitter
- SAPA
