Madonsela ontken bewerings van vooroordeel
2012-10-15 17:55
Pretoria – Adv. Thuli Madonsela, Openbare Beskermer, het Maandag bewerings van vooroordeel, wat deur haar adjunk, Mamiki Shai, gemaak is, verwerp.
Shai het na bewering aan die Sunday Times gesê Madonsela het die bevindings van 'n verslag na die DA-beheerde Midvaal-munisipaliteit verander en opsetlik die vrystelling daarvan tot ná die munisipale verkiesings vertraag.
"Om te sê ek het gewag met die verslag om te verseker dat die DA in Midvaal wen, is regtig moedswillig en moet bevraagteken word. Ons werk deur 'n memo-stelsel in ons kantoor, wat aandui wanneer 'n verslag aan my gegee is," het Madonsela gesê.
"Verslae word nie na jou gegooi wanneer jy by die deur instap nie. Ek dink mense moet die Midvaal-verslag lees en dan die persoon wat my beskuldig, vra wat was in die verslag en wat verwyder is wat die finale verslag onregverdig maak."
Madonsela het gesê sy wou hê die ANC in Midvaal moet betrokke wees by die ondersoek na haar beweerde vooroordeel.
Die Openbare Beskermer het gesê haar bevindings is geloofwaardig.
"Ek het nog nooit 'n besluit gemaak wat ek nie kan regverdig, of wat die verslag nie kan regverdig nie. Ek daag julle as joernaliste uit om die verslae te lees, veral die een oor Midvaal, wat die absurdste bewerings het."
Madonsela het die parlement se besluit verwelkom om die portefeulje-komitee van justisie aan te stel om verskeie bewerings oor haar kantoor te ondersoek. Dié bewerings is in 'n reeks anonieme briewe gemaak.
Sy het in Julie gevra dat 'n ondersoek gedoen moet word.
– Volg Nuus24 op Twitter
- SAPA
