Madiba waarskynlik vandag ontslaan

2012-12-14 09:32

Johannesburg – Volgens ‘n mediaberig sal oudpres. Nelson Mandela waarskynlik vandag uit ‘n mediese fasiliteit ontslaan word, nadat hy die afgelope ses dae in ‘n hospitaal deurgebring het.

Eyewitness News berig die plan was om die 94-jarige voormalige staatshoof Donderdag uit die fasiliteit te ontslaan en na sy huis in Houghton, Johannesburg, te neem. Dokters het egter besluit om hom nog ‘n aand in die hospitaal te hou.

Sapa berig plaaslike en internasionale joernaliste het sedert sy hospitalisasie verlede naweek, buite die 1 Militêre Hospitaal saamgedrom. Dit het intussen aan die lig gekom dat die oudpresident nie hier opgeneem is nie.

Mac Maharaj, woordvoerder vir die presidensie, het in 'n radio-onderhoud op 702 Talk Radio gesê die regering het nie die media of die land probeer mislei oor die hospitaal waar Madiba opgeneem is nie.

Hy sê Mandela is in 'n vooraanstaande privaat hospitaal in Pretoria.

Volg Nuus24 op Twitter