'Madiba verloor sy sprankel' – Graça

2012-12-11 08:08

Kaapstad – Oudpres. Nelson Mandela se vrou, Graça Machel, het in 'n vroeëre onderhoud gesê dis hartseer om te sien hoe haar man se gesondheid agteruitgaan.

Sy het in 2009 aan die nuuskanaal eNCA gesê dis pynlik om hom te sien oud word.

Machel het in die onderhoud gesê ‘n mens verstaan dit moet gebeur, maar dis hartseer om die sprankel te sien verdof.

Die presidensie se woordvoerder, Mac Maharaj, sê mediese toetse op die oudpresident duur voort. Hy hou vol Madiba is in goeie hande.

Duisende Suid-Afrikaners het Mandela 'n spoedige herstel toegewens, nadat hy die naweek in die hospitaal opgeneem is.

Sapa het vroeër berig pres. Jacob Zuma het Madiba (94) besoek en gesê hy word goed versorg.

Dit is die tweede keer vanjaar wat die voormalige staatshoof in die hospitaal opgeneem word.

Mandela het nog nie in die publiek verskyn sedert Suid-Afrika in 2010 die Wêreldbeker-sokkertoernooi aangebied het nie.

– Mediabronne het vroeër berig dat die onderhoud met Machel Maandag gevoer is. Dit is nie korrek nie. Nuus24 vra om verskoning vir die ongerief.

Volg Nuus24 op Twitter