Madiba help Zuma met skuld, lui verslag

2012-12-07 10:02

Johannesburg – ‘n Ouditeursverslag wat Vrydag deur Mail & Guardian gepubliseer is, het onthul hoe verskeie weldoeners pres. Jacob Zuma se "roekelose" lewenstyl met meer as R7 miljoen befonds het.

Die koerant berig hy kan noodsaaklike bewyse in die saak teen die president indien; bewyse wat geheim gehou is toe die nasionale vervolgingsgesag die saak teen hom laat vaar het.

M&G het die hoof-bevindings van dié forensiese verslag, wat KPMG in 2006 vir Zuma se verhoor voorberei het, gepubliseer. Die verslag is byna 500 bladsye lank.

Die verslag ontbloot dat die president dikwels geld aanvaar het. Dit sluit in 'n tjek van oudpres. Nelson Mandela op 23 Junie, 2005, ter waarde van R1 miljoen. Zuma se onderskeie bankrekenings was luidens die verslag in dié stadium met meer as R400 000 oortrokke.

Die verslag beskryf ook hoe betalings deur Schabir Shaik voortgegaan het lank ná die saak teen dié omstrede sakeman in 2004 begin het.

Altesaam 783 betalings van Shaik of sy Nkobi-groep aan Zuma is geïdentifiseer. Die betalings beloop R4 072 500 – aansienlik meer as die bedrag van R1,25 miljoen wat ten tye van Shaik se saak genoem is. 

– Lees hier meer.

Volg Nuus24 op Twitter