Mac wou ANC se geheime blootlê
2011-12-11 08:30
Julian Rademeyer en Thanduxolo Jika, Media24-Ondersoeke
Johannesburg – Mac Maharaj, oudminister van vervoer en deesdae pres. Jacob Zuma se beeldpoetser, was bereid om ANC-geheime te ontbloot om vervolging vry te spring.
Dié plofbare onthulling is vervat in dokumente wat ingedien is as deel van ’n aansoek in die hooggeregshof in Pretoria waarmee Maharaj en sy vrou, Zarina, gehoop het om die Skerpioene se ondersoek na hul doen en late ’n paar jaar gelede uit die weg te ruim.
Die Skerpioene het bewerings van bedrog en korrupsie rondom die toekenning van kontrakte vir rybewyskaarte en die N3-tolpad teen hulle ondersoek.
Die hofdokument uit 2007, waarvan ’n afskrif in Rapport se besit is, bevat transkripsies van omstrede geheime bandopnames van Maharaj se vroeëre getuienis in 2003 aan die Skerpioene.
Dié transkripsies speel nou ’n sleutelrol in die twis tussen die media en Maharaj omdat dit klaarblyklik kan bewys Maharaj het tydens sy ondervraging gelieg. Dit kan tot strafregtelike klagte teen hom lei.
Maharaj het strafregtelike klagte ingedien teen twee Mail & Guardian-verslaggewers wat toegang tot die transkripsies gekry het. Rapport se susterkoerant City Press is ook gedreig met regsoptrede nadat uittreksels van die transkripsies wat reeds in 2007 in die koerant was, onlangs weer gepubliseer is.
Media24 se ondersoekspan het die afgelope week – soos die Wet op die Nasionale Vervolgingsgesag vereis – die direkteur van openbare vervolging, adv. Menzi Simelane, toestemming gevra om die transkripsies te publiseer wat die Maharaj-egpaar self by hul hofaansoek ingesluit het.
Verskeie plofbare onthullings word ook gemaak in die korrespondensie tussen die Maharaj-egpaar se prokureurs en die Skerpioene. Dié inligting word nie deur wetlike voorskrifte oor vertroulikheid beskerm nie.
* Die Skerpioene vermoed die egpaar het tydens hul getuienis onder eed gejok.
* Die Maharaj-egpaar is gevra om ’n lening van $200 000 deur ’n geheimsinnige “Hamaid Baig” in Maart 1998 aan hulle te verduidelik.
* Die Maharaj-egpaar het aangebied om sensitiewe inligting oor die ANC te bloot te lê.
* Die Skerpioene se ondersoek na die bedrywighede van Schabir Shaik in die wapenskandaal het vrae ontlok oor die egpaar se verhouding met Shaik.
* Die Skerpioene het betalings van Shaik in die Maharaj-egpaar se buitelandse bankrekenings nagespoor uit die tyd toe Maharaj nog ’n minister was.
In een van die opspraakwekkendste briewe het die Maharaj-egpaar se prokureurs in September 2005 probeer om “aansienlike uitstel” te kry om te reageer op moontlike onakkuraathede in hul getuienis.
Hierin onthul hulle hul aanbod om ANC-geheime te openbaar.
Die brief suggereer dat Maharaj se onthulling (van ANC-geheime) lig sou werp op die getuienis wat die Skerpioene teen die egpaar gekry het.
“Die probleem verbonde daaraan om die inligting in hierdie stadium openbaar te maak,” lui die brief, “is dat die besonderhede van die getuienis hoogs sensitiewe en komplekse historiese aktiwiteite binne die ANC met betrekking tot die stryd teen apartheid aanraak en dat die onthullings ernstige skade kan aanrig.”
Die Maharaj-egpaar se prokureurs het ook gesê dat hulle ’n “dossier” sou saamstel met dokumentasie om hul saak te bewys.
Die versoek dat die Maharaj-egpaar meer tyd kry om te reageer, is geweier, waarna hulle die hofaansoek gebring het. Die saak is laat vaar nadat die Skerpioene, wat intussen ontbind is, besluit het om die ondersoek teen die Maharaj-egpaar te staak.
Maharaj het nie die afgelope week gereageer op versoeke om kommentaar nie.
* Maharaj en sy vrou se prokureur het teen die naweek aangedui dat hulle ’n obskure oorblyfsel van die apartheidswette wil gebruik om 'n strafregtelike klagte teen City Press en Media24 se ondersoekspan in te dien oor die publikasie van hul beweerde leuens aan ondersoekbeamptes.
– Volg Nuus24 op Twitter
- Rapport
