Maatskappy sê jeugliga skuld hom miljoene

2012-12-05 10:45

Johannesburg – ’n Aansoek om die ANC se jeugliga te laat likwideer, is Dinsdag by die stad se hooggeregshof ingedien.

Luidens hofstukke sê die beslote korporasie Z2 Presentations die jeugliga skuld hom sowat R12,8 miljoen, het Beeld berig.

Dit sluit R7,6 miljoen in vir dienste wat hulle by die liga se berugte Bloemfonteinse kongres in 2008 gelewer het, toe Julius Malema as die leier verkies is.

Die res van die skuld is grootliks rente wat sedertdien opgeloop het.

Marius van Rensburg, regsverteenwoordiger van Z2 Presentations, het bevestig dat die likwidasie-aansoek gebring is.

Die dagblad berig die jeugliga se waarnemende leiers kon nie vir kommentaar bereik word nie.

Keith Khoza, ANC-woordvoerder, het gesê die party is nie bewus van enige likwidasie-aansoek nie.

Volgens hom is dit egter hoogs onwaarskynlik dat die jeugliga gelikwideer sal kan word.

Volg Nuus24 op Twitter  

- SAPA