'Maak dronkryers skaam'
2011-02-24 08:55
Durban. – Suid-Afrikaanse motoriste is meer bekommerd dat hulle uitgevang sal word as hulle dronkbestuur of jaag as oor die mense wat hulle daardeur kan doodmaak.
Dís ’n houding wat Willies Mchunu, KwaZulu-Natalse LUR vir vervoer, wil omkeer deur onder meer maandeliks die name aan die groot klok te hang van mense wat in die provinsie weens dronkbestuur gevonnis is.
Die LUR het Woensdag die name van 55 mense bekend gemaak wat in Oktober aan dié misdryf skuldig bevind is.
Mchunu het gesê die departement oorweeg dit om oortreders se woonadresse en selfs hul foto’s in die toekoms te publiseer.
Die grootste boete onder die 55 was R30 000 aan G.M. Tifflin in Scottburgh. Tifflin se rybewys is ook vir twee jaar opgeskort.
Mthokozisi Ndlovu (27) is in Pietermaritzburg gevang met ’n bloedalkoholvlak van meer as vyf keer die wettige perk. Hy is met R3 000 beboet en sy rybewys is geëndosseer, wat beteken met ’n volgende oortreding kan ’n swaarder straf aan hom opgelê word.
Caro Smit, stigter van South Africans Against Drunk Driving, het gesê Ndlovu se bloedalkoholvlak was gelykstaande aan 13 sopies brandewyn. In so ’n geval is ’n mens 150 keer meer geneig om ’n ongeluk te maak en sal dit 13 uur duur voordat jy nugter genoeg is om te bestuur, het sy gesê.
Sy het Pietermaritzburgse howe gekritiseer omdat oortreders se rybewyse in slegs drie uit die 28 aangemelde sake (9%) daar opgeskort is. Die gemiddelde in die res van die gevalle was 50%.
Smit het gesê wetgewing maak voorsiening vir boetes van tot R120 000.
“Oortreders se regte word beskerm – hulle kan prokureurs en advokate aanstel om hulle te verdedig – maar nie dié van die slagoffer en hul families nie,” het sy gesê.
Die langste tydperk waarvoor ’n rybewys opgeskort is, was vyf jaar.
In Desember is 416 mense in die provinsie gevang wat onder die invloed van drank bestuur het en in Januarie 215.
Volg Nuus24 op Twitter