Ma wat baba glo moor, kry 1 in tronk
2010-03-12 09:43
Sonja van Buul, Beeld
Johannesburg - ’n Jong ma wat van die moord op haar babaseuntjie aangekla word, het Donderdag in die hofselle in Vanderbijlpark geskreeu toe haar nuwe baba van haar weggeneem is.
Wilhelmina Johanna (Mimmie) Kraft (24), wat die vier maande oue Daniël na bewering vermoor het, het op 31 Januarie in die Diepkloof-gevangenis in Johannesburg die lewe aan nog ’n seuntjie geskenk.
Kraft is op 24 Junie verlede jaar ná ondervraging in hegtenis geneem. Vroeg daardie oggend is Daniël vermoedelik eers versmoor en daarna op Barrageweg neergesit waar ’n voertuig moontlik oor hom gery het.
“Daar word vir die baba se veiligheid en lewe gevrees as hy langer in die gevangenis, waar sy verhoorafwagtend is, in die ma se sorg gelaat word,” het insp. Tinus Oosthuizen, ondersoekbeampte in die moordsaak, Donderdag buite die hof gesê.
Met net ’n klein botteltjie babamelk, ’n kombersie, ’n paar weggooidoeke en die kleertjies aan sy lyf het Kraft die baba gister van die gevangenis na die hof gebring.
Hofpersoneellede het rondgeskarrel om die baba te versorg nadat hy uit die hofselle verwyder is.
Danny Labuschagne (21), Daniël se pa, was nie Donderdag by die hof nie.
Daniël se lykie is in die lang, droë gras langs die pad tussen ’n bos turksvye aan die brand gesteek waar dit later sowat 200 m van Kraft en Labuschagne se woonstel op die Stefanopark-kleinhoewes buite Vanderbijlpark gevind is.
Kraft en Labuschagne is ook die ouers van ’n driejarige dogtertjie wat in pleegsorg is.
Daniël is bo-op nog ’n babasussie, wat in 2005 ’n dag ná haar geboorte dood is, begrawe. Die oorsaak van dié baba se dood is nie bekend nie.
Die moordsaak is tot 25 Maart uitgestel omdat Kraft glo erg ontsteld is omdat sy van haar jongste kind geskei is.
Terwyl sy in die Vanderbijlpark-polisieselle aangehou is, het Kraft twee keer probeer selfmoord pleeg deur haarself met haar baadjie op te hang.
- Beeld