Ma, vriend verhoor ná naakfoto's van kind
2011-07-14 07:08
Kroonstad - ’n Ma van die dorp en haar vriend word volgende maand in die hof vir seksuele misdade in Welkom verhoor op verskeie seksverwante aanklagte nadat haar 9-jarige dogtertjie na bewering met die dood gedreig is as sy geweier het dat die vriend seksueel prikkelende naakfoto’s van haar neem.
Johann Wiegand, aanklaer, het Woensdag in die streekhof op Kroonstad gesê die direkteur vir openbare vervolging (DOV) het beslis die ma en vriend moet verhoor word.
Dit blyk die vertoë wat die verdediging aan die DOV oor hul vervolging gerig het, het misluk.
Die ma en vriend staan albei voorlopig tereg op aanklagte van seksuele aanvoorwerk, beter bekend as grooming, die gebruik van ’n kind vir kinderpornografie, die vervaardiging van kinderpornografie en die besit van kinderpornografie.
Die man is ook aangekla van onsedelike aanranding en ontbloting.
Streeklanddros Rudi Smit het die verhoor Woensdag op versoek van die staat na dié streekhof in Welkom oorgeplaas.
Die ma het Woensdag met ’n sonbril op haar kop alleen by die hofgebou opgedaag. Sedert haar eerste hofverskyning maande gelede is sy nog elke keer deur ’n vriend en ’n vrou wat glo haar suster is, ondersteun.
’n Bejaarde paar, vermoedelik die man se ouers, het hom Woensdag weer by die hof ondersteun.
Geklee in ’n motorfietsryersbaadjie het hy soos voorheen voor die hofverskyning styf langs hulle gesit.
Selfoonkamerafoto’s en -videos is na bewering van die kaal gr.2-leerling geneem kort nadat haar ma ’n beweerde seksorgie met dié man en ’n ander man gehad het.
Die beweerde orgie het glo reg voor die kind plaasgevind.
Luidens hofstukke moes die kind ná die beweerde seksorgie op 2 Augustus 2009 naak in seksueel prikkelende posisies poseer vir foto’s en videos wat glo met ’n Nokia-selfoon geneem is.
Die kind is gedreig dat sy met ’n steakmes in die hart gesteek gaan word as sy weier om te poseer, lui hofstukke.
Die ander man wat glo by die beweerde seksorgie met die aangeklaagdes betrokke was, is nie aangekla nie.
Die ma en vriend moet op 18 Augustus in Welkom in die beskuldigdebank staan.
- Volksblad