Ma vind dogter se lyk in vullisdrom

2012-10-06 12:57

Johannesburg – Die lyk van 'n 21-jarige vrou is in 'n vullisdrom in Uitbreiding 24 van Jouberton gevind, het die polisie in die Noordwes Saterdag gesê.

"In hierdie stadium toon die voorlopige ondersoek dat die oorsaak van haar dood 'n hou met 'n stomp voorwerp teen die kop was, maar ons wag vir die uitslag van die lykskouing om dit te bevestig," het kapt. Amanda Funani gesê.

"Weens die warm weerstoestande in die provinsie het die lyk reeds begin ontbind. Die vullisdrom was na bewering in 'n spaarkamer in 'n huis weggesteek waar die slagoffer alleen gewoon het."

Funani het gesê die vrou se ma het haar Donderdagaand gebel en kon haar nie in die hande kry nie. Die ma het Vrydag na Jouberton gegaan en die lyk van haar dogter in die vullisdrom gevind.

"Die ma en haar bure het die huis deursoek en daar was 'n reuk wat uit die spaarkamer gekom het," het sy gesê.

'n Moordsaak is geopen en die ondersoek duur voort, het Funani bygevoeg.

– Volg Nuus24 op Twitter.

- SAPA