Ma verkla haar seun wat haar motor 'leen'
2012-02-06 07:02
Pretoria – ’n Ma van Centurion het ’n saak by die polisie teen haar 16-jarige seun aanhangig gemaak nadat hy haar motor sonder toestemming gevat het en teen ’n hoë spoed van die polisie weggejaag het.
Hy het verskeie rooi verkeersligte verontagsaam voordat hy deur ’n duikklopper-onderneming se hek gejaag het.
Die polisielede het die seun, wat ligte beserings opgedoen het, uit die voertuig gesleep omdat hulle bang was die voertuig raak aan die brand.
Kapt. Brian Plaatjies, polisiewoordvoerder, het gesê sake van roekelose of nalatige bestuur en die gebruik van ’n voertuig sonder die eienaar se toestemming word teen die seun ondersoek.
Plaatjies het gesê die seun het Vrydagaand ’n rusie met sy ma gehad. Hy het haar rooi Daihatsu Terios gevat en by hul erf uitgejaag.
Die polisielede het gesien hoe hy teen ’n hoë spoed by hulle verbyjaag. Hy wou nie stilhou nie en hetverskeie verkeersligte en stopstrate verontagsaam.
Na wat verneem word, het die seun in ’n stadium teen soveel as 160 km/h deur Centurion se strate gejaag. In Rivierweg het die seun om ’n draai beheer oor die motor verloor, deur Centurion Panelbeaters se hek gejaag en teen ’n paal tot stilstand gekom.
Hy het ligte beserings opgedoen. Hy is nie in hegtenis geneem nie.
– Volg Nuus24 op
Twitter
- Beeld