Ma verdwyn spoorloos ná MXit-ontmoeting
2010-01-20 07:01
Tom de wet
Bloemhof - ’n Vrou van dié dorp het sonder taal of tyding met haar twee kinders verdwyn nadat sy glo ’n man deur ’n selfoon-kletskamer ontmoet het.
Nellie Matthysen (38) het haar klere, meubels en ander besittings net so in haar woonstel in die dorp gelos toe sy begin Desember met haar twee kinders, Arno (12) en Isabel (6), weg is.
Haar familie in Hoopstad en Virginia is siek van bekommernis, omdat sy op geen oproepe of boodskappe reageer nie. Selfs ’n aanbod dat hulle vir haar geld stuur, het geen reaksie ontlok nie.
Clasina Britz, haar suster op Virginia, het gesê die familie is baie bekommerd dat iets dalk met haar en die kinders gebeur het.
Hulle kon nie eers vasstel of die kinders vanjaar elders by ’n skool ingeskryf is nie.
Matthysen en haar man is vervreem van mekaar en sy het daarna van Hoopstad na Bloemhof getrek, waar sy sowat ’n jaar gebly het.
“Sy het net die nodigste, soos as jy vir ’n rukkie gaan kuier, saam met haar gevat.
“Ons het haar en die kinders ’n paar dae ná hul verdwyning as vermis by die polisie aangemeld en by hulle verneem dat kennisse beweer Nellie het iemand deur MXit ontmoet.
“Dit is vir ons geen probleem nie. As sy gelukkig is, is ons bly. Maar iets is fout, omdat ons absoluut niks van haar hoor nie.”
Die polisie het gesê die selfoonnommers wat hulle vir Matthysen het, is nie meer aktief nie. Sy het ook geen bankrekenings of ander rekenings wat hulle kan gebruik om haar op te spoor nie.
Enigiemand met inligting oor Matthysen en die kinders kan Britz by 076 191 4507 bel of haar ander suster, mev. Hannetjie Botha, by 072 242 7754.
- Die Burger