Ma vas oor moord op baba

2012-12-07 17:15

Johannesburg – 'n Vrou van Butterworth is Vrydag in hegtenis geneem ná sy na bewering haar twee maande oue babaseun verwurg het, het die Oos-Kaapse polisie gesê.

"Die verdagte het aan haar familie gesê dat sy haar seun op 21 November verwurg het, en besluit het om hom in 'n woud weg te steek," het kapt. Jackson Manatha gesê.

"Die baba is in 'n baie slegte toestand gevind. Die motief vir dié grusame moord is nog nie vasgestel nie, maar die gesin het besluit om die polisie van die misdaad in kennis te stel, en die vrou is in hegtenis geneem en aangekla van moord."

Die vrou se ma het haar gevra waar die baba is, en sy het gesê sy het hom na sy pa se kleinhoewe geneem.

Die familie het met die pa se kind in verbinding getree, en uitgevind dit is nie waar nie. Sy het toe die familie na die woud gelei, waar die kind se lyk gevind is.

Die vrou sal na verwagting Maandag in die Butterworth-landdroshof verskyn op 'n aanklag van moord.

– Volg Nuus24 op Twitter.

- SAPA