Ma 'jammer' dat sy baba verwaarloos

2012-08-09 16:01

Johannesburg – 'n Ma van Soweto het gesê sy is "jammer" dat sy haar baba alleen by die huis gelos het om te gaan drink, het die New Age Donderdag berig.

Die 28-jarige vrou is Maandag vrygelaat nadat sy in hegtenis geneem is vir kinderverwaarlosing.

Die vrou se kêrel het haar Sondag dronk by 'n kuierplek gevind terwyl haar vier maande oue baba alleen by die huis in Soweto was, het die koerant berig.

"Die enigste rede hoekom ek die baba gelos het, was omdat ek depressief en alleen was," het sy gesê.

"Sedert die baba gebore is gee my kêrel nie meer om vir my nie, drank help my om van my probleme te vergeet."

"Ek wou nooit 'n kind hê nie. Die enigste rede hoekom ek 'n baba gekry het is omdat my kêrel my vir een gevra het. Nou dat ek vet is, is ek nie meer goed genoeg vir hom nie."

Haar kêrel, wat die polisie ontbied het, het die aanklagte later laat vaar.

– Volg Nuus24 op Twitter.

- SAPA