Ma in huis in Hermanus vermoor
2011-10-27 08:02
Kaapstad en Hermanus – Die moord op ’n ma van twee het die rustige Overbergse vakansiedorp Hermanus Woensdag geskud.
Juliet Haw (43) van Voëlklip is glo in haar huis oorval, vasgebind en doodgesteek.
Haw se pa, wie se naam nie bekend is nie, het omstreeks 15:35 op sy dogter se lyk in haar huis in Derde Straat afgekom nadat haar kinders se skool hom gebel het.
“Die skool het die oupa omstreeks 14:45 gebel om te sê die kinders, onderskeidelik 10 en 12 jaar oud, is nog nie gehaal nie,” het ao. November Filander, provinsiale polisiewoordvoerder, gisteraand gesê.
Die pa het om 12:00 die laaste keer met sy dogter gepraat toe sy ’n grassnyer by hom wou leen.
Filander het gesê die pa is toe na Haw se huis en het deur ’n kamervenster gesien die huis is deurmekaar.
“Hy het na die voordeur gestap wat toe was, maar nie gesluit nie. Hy het die hele huis deursoek, maar kon nie sy dogter vind nie.”
Die laaste vertrek wat die pa deursoek het, was die spens langs die kombuis. Dit is hier waar hy Haw vasgebind en vol steekwonde aan haar bors gekry het.
Dit is onduidelik of die moordenaar die mes in die huis gekry het en of die persoon dit saamgebring het. Filander kon nie sê hoeveel keer Haw gesteek is nie.
Dit blyk in die stadium dat slegs haar selfoon weg is.
Na verneem word, was sy nie getroud nie. Vriende van die vermoorde het by haar huis opgedaag nadat hulle die nuus gehoor het. Een vriend het gesê: “Ons het ’n briljante gees verloor.”
Bure was baie ontsteld om te hoor ’n moord het etlike meters van hul huise af gebeur. Die omgewing is as “’n stil buurt” bestempel.
’n Man het gesê hy was die hele dag by die huis, maar het niks verdag gehoor of gesien nie.
“Ons kan nie glo dit is Juliet nie. Sy het kinders. Ons kan nie glo sy is vermoor nie,” het ’n bejaarde buurman gesê.
Niemand is teen laat Woensdagaand nog in verband met die moord in hegtenis geneem nie.
Hannes Kleynhans (66), ’n gesiene sakeman in die myn- en juweliersbedryf en jare lange president van Hermanus se gholfklub, is twee jaar gelede voor sy vrou in die kop geskiet nadat drie gewapende mans doodluiters by hul huis in Fernkloof se agterdeur ingestap het.
’n Amerikaanse sakeman, Perry Page, is in 2007 in sy huis in Hoofstraat vermoor toe hy en sy vrou aangeval is. Page is in die nek en bors gesteek en sy vrou met tou vasgebind. Hy is op die toneel dood. Sy vrou, Sally-Ann, het oorleef.
– Volg Nuus24 op Twitter
- Die Burger