Ma dalk ook vervolg ná sangoma met 13-jarige trou
2013-02-05 10:55
Johannesburg – Meer verdagtes kan dalk vervolg word vir hulle betrokkenheid by die huwelik van ‘n 13-jarige meisie van Limpopo en ‘n 57-jarige sangoma, het die polisie in Limpopo Dinsdag gesê.
“Ons het die ondersoek uitgebrei en dit duur voort... daar kan nog mense wees wat in verband met die saak aangekla word,” het ‘n polisiewoordvoerder, brig. Hangwani Mulaudzi, gesê.
Hy het ook gesê die tiener, wat ‘n epilepsielyer is, is na ‘n plek van veiligheid in Polokwane geneem.
Die Sangoma is op 23 Januarie in hegtenis geneem nadat ‘n inwoner hom glo by maatskaplike dienste verkla het. Aanklagte teen hom is later teruggetrek, aangesien die meisie se ouers toestemming vir die huwelik gegee het.
Die meisie se ma het glo gesê die sangoma het haar dogter twee jaar lank behandel en haar van haar epilepsie genees.
Die sangoma het later gesê die meisie se voorvaders pla haar en sy moet aanhoudend gemonitor word. Hy het toe aangebied om met haar te trou.
‘n Saak van statutêre verkragting is intussen weer teen die sangoma aanhangig gemaak.
Mulaudzi het gesê die kind se ma kan tereg staan op twee moontlike aanklagte – een van nalatigheid en ‘n ander omdat sy die kind toegelaat het om ‘n seksuele verhouding met ‘n ouer man te hê.
Die nasionale vervolgingsgesag sal besluit of die ma aangekla sal word, het Mulaudzi gesê.
– Volg Nuus24 op Twitter
- SAPA
