Ma, baba dood in vloede
2010-01-26 17:15
Johannesburg – Die liggame van ‘n vrou en haar ses maande oue baba is Dinsdag gevind nadat hul huis deur vloede in Tembisa Phomolong-informele nedersetting, oos van Johannesburg, weggespoel het.
‘n Span van die rampbestuur en die polisie het hul liggame langs die stroom in Esangweni, vier kilometers vanaf Phomolong gevind, het Zweli Dlamini, woorvoerder van die Ekhurleni munisipaliteit gesê.
Die ma en kind, wat sedert Maandagaand vermis word toe kitsvloede die area getref het, is 100m van mekaar af gevind.
Volgens Dlamini het die vrou se man dit reggekry om twee ander kinders te red, maar hy kon nie by sy vrou en baba uitkom nie.
Hy het gesê die munisipaliteit werk hard om alternatiewe akkomodasie vir ongeveer 200 hawelose inwoners te vind.
Intussen is Atlas-weg in Benoni gesluit tot verdere kennisgewing weens die vloede. Volgens Dlamini kan die pad vir ‘n dag of twee gesluit wees.
- Sapa