MTN sal samewerking gee in korrupsie-ondersoek
2012-06-06 10:45
Johannesburg – Die MTN-groep sal in die ondersoek, wat verband hou met 'n selfoonlisensie in Iran, sy volle samewerking aan die Valke gee, het ‘n beampte Dinsdag gesê.
“Soos ons voorheen gesê het, duld MTN geen korrupte of onetiese praktyke nie,” het die groep se woordvoerder, Xolisa Vapi, in ‘n verklaring gesê.
Hy sê MTN se raad van direkteure het die Hoffmann-komitee aangestel om ‘n onafhanklike ondersoek te doen oor die aantygings wat deur die Turkse selfoonoperateur Turkcell gemaak is.
Die ondersoek volg op ‘n siviele eis van $4,2 miljard (sowat R35,8 miljard) wat in Maart deur Turkcell ingedien is.
Turkcell het MTN daarvan beskuldig dat hy Irannese en Suid-Afrikaanse beamptes met geld en beloftes van verdedigingstoerusting omgekoop het om die lisensie, wat oorspronklik aan Turkcell toegeken is, te wen.
MTN het vroeër ook onder skoot gekom ná dokumente gevind is wat glo toon dat die Iranse selfoonnetwerk waarin hy 'n groot aandeel het, gesofistikeerde Amerikaanse rekenaartoerusting bekom het – dít ten spyte van sanksies wat die verkoop van Amerikaanse tegnologie aan die land verbied.
– Volg Nuus24 op Twitter
- SAPA
