M&G-joernaliste verdagtes in kriminele saak

2012-07-26 17:00

Johannnesburg – Twee joernaliste en die redakteur van die Mail & Guardian is formeel gewaarsku dat hulle verdagtes is in 'n kriminele saak wat deur Mac Maharaj, presidensiële woordvoerder, aanhangig gemaak is, berige Eyewitness News.

Die woordvoerder het voorheen gesê dokumente wat verband hou met 'n ondersoek wat in camera gehou is, is onwettig aan die koerant gegee.

Nic Dawes, redakteur van die Mail & Guardian, en die joernaliste Stefaans Brummer en Sam Sole is Donderdag geroep na 'n vergadering by die gespesialiseerde handelsmisdaadeenheid in Pretoria.

Dawes het gesê hulle is in dié vergadering formeel gewaarsku dat hulle verdagtes is in 'n kriminele saak.

Dawes en die joernaliste is aangekla omdat hulle die Wet op die Nasionale Vervolgingsgesag oortree het.

Die aanklagte hou verband met 'n uitgawe van die koerant wat die woord “censored” op die voorblad gehad het. Dít nadat hulle 'n brief van Maharaj ontvang het, waarin hy die koerant waarsku teen die publisering van 'n berig oor hom.

– Lees meer hier

– Volg Nuus24 op Twitter