M-Net kry boete oor gruweltonele
2011-01-07 09:00
Johannesburg - M-Net is met R5 000 beboet nadat ’n advertensie met afstootlike tonele uit gruwelflieks in gesinstyd uitgesaai is.
Dit het drie klagte op een dag by die Uitsaaiklagtekommissie van Suid-Afrika (Ukksa) tot gevolg gehad.
“Hoe verduidelik ek aan my vyfjarige kind wat die gedrogte is wat sy pas moes aanskou” wou ’n klaer weet.
Volgens dié persoon bevat die advertensie ook ’n toneel van ’n vrou in ’n stort wat haar hare was en oomblikke later aangeval word deur ’n hand wat by haar kop uitkom.
Die advertensie is op 13 Oktober verlede jaar net ná 18:00 uitgesaai.
Volgens Ukksa het M-Net die advertensie uitgesaai met die oog op ’n gruwelfliekfees later daardie maand op M-Net.
Volgens M-Net was ’n “interne fout” die oorsaak vir die uitsending van die advertensie in daardie tydgleuf.
“Dit bevat tonele uit verskeie gruwelflieks. Nadat ons dit hersien het, het ons interne klassifikasiespan besluit dat dit net ná 21:30 uitgesaai mag word.
“Die uitsending 18:00 was ’n fout deur ’n skeduleerder wat nie by ons besluit gehou het nie,” lui M-Net se kommentaar.
Volgens Ukksa kan kinders negatief deur sulke beelde geraak word.
“Dié negatiewe emosionele en sielkundige impak kan slegte en selfs blywende gevolge vir die kind inhou.”